Түркістан облыстық «Farab» әмбебап ғылыми кітапханасының ұйымдастыруымен Ордабасы аудандық орталық кітапханасында «Open library – 2023» эстафетасының ашық есік күні өтті. Аталмыш шараға Түркістан қалалық, Бәйдібек, Отырар, Сауран, Созақ, Сарыағаш аудандық кітапхана қызметкерлері мен құрметті азаматтары қатысты.
Эстафетаны Ордабасы аудандық мәдениет, тілдерді дамыту, денешынықтыру және спорт бөлімінің басшысы Құрманәлі Жылқыбай, «Ордабасы оттары» газетінің редакторы Нұриддин Шәмшіұлы, Ордабасы ауданының Құрметті азаматы, аудандық аналар кеңесінің төрайымы Зәуреш Әбіш, аудандық әйелдер кеңесінің төрайымы Гулия Тайтелиева, Түркістан облыстық Фараб әмбебап ғылыми кітапханасының балалар бөлімінің меңгерушісі Айнұр Қабылбекқызы ашып берді.
Шара барысында Ордабасы өңірінің тарихынан сыр шертетін арнайы жабдықталған кітаптардан интсалляциялық көрмелер жасақталып, қатысушыларға таныстырылды.
Ашық аспан аясындағы эстафета кітапхананың «Бізде қонақта…» оқырман бенефисі аясында жергілікті режиссер Перизат Баймаханованың шығармашылық кешімен жалғасын тапты.
Айта кетейік, эстафетаның негізгі мақсаты – халықты кітап оқуға шақырудың жаңа әдістерін ұсыну, кітапханаларға оқырман тарту және басқа облыстар мен қалалар арасында әріптестік байланысты нығайту, өлкеден шыққан жас қаламгерлерді көпшілікке таныта отырып жігерлендіру.
Түркістан облыстық мәдениет және туризм
басқармасының баспасөз қызметі
