Қостанай қаласында өтіп жатқан көкпардан жасөспірімдер арасындағы ел чемпионаты өз мәресіне жетті. Республикамыздың 15 өңірінен келген 2006-2008 жылы туған жасөспірімдер құрамалары өзара мықтыны анықтады. Ел чемпионатын ҚР Мәдниет және спорт министрлігі, ҚР ұлттық спорт қауымдастығы және Қостанай облысының әкімдігі ұйымдастырған.
Алты күн бойы Қостанай атшабарын додаға айналдырған дүбірлі жарыста көкпар спортының жаңа да жас буыны қалыптасқаны анық көрінді. Ақтық сында түркістандықтар Қарағанды облысының құрамасын 14:1 есебімен ұтып, жарқын жеңіске жетті. Жеңімпаздарды талай жетістіктерге бастап келе жатқан атақты Бақтыбай шабандоздың ұлы, команда капитаны Нұрдәулет Төлешов бастаған өрендер тартысты чемпионатта дәстүрлі түрде тоғызыншы рет Ел чемпионы атанды. Білікті басшы Болат Қонаев басқаратын Түркістан облыстық ұлттық спорт түрлерінен мамандандырылған балалар-жасөспірімдер спорт мектебінің шәкірттері осылайша өздерін тағы да дәлелдеді.
Екінші орынға ие болған Қарағанды облысының командасы ерекше өнер көрсетті. Ел біріншілігінің үшінші орын тұғырына Алматы мен Шымкент қаласының командалары көтерілді. Жеңімпаздар арнайы диплом мен кубокпен және ҚР ұлттық спорт қауымдастығы тағайындаған ақшалай сыйақымен марапатталды.
Түркістан облысының Өңірлік коммуникациялар қызметі
