Түркістан облысының талантты каратэшілері Жапонияда өткен әлемдік додада Қазақстанның намысын қорғап қайтты. Білікті бапкер Боран Төлеев жаттықтыратын талантты спортшылар жуырда Күншығыс елінің Фукуока қаласында өткен «Karate-1 Premier League» әлемнің ең таңдаулы деген саңлақтары бас қосқан топ-32 мықтылардың рейтингтік турнирінде жүлдеге қол жеткізді.
Гүлмира Үсенова 55 келі салмақта өнер көрсетіп, қола медаль еншіледі. Сонымен қатар, келешегі кемелді тағы бір спортшымыз Абылай Төлтай +84 келі салмақта сынға түсіп, туған елге қола медальмен оралды. Жүлдемен оралған спортшылар білікті басшы Самат Рысбеков жетекшілік ететін Түркістан облысының олимпиадалық емес жоғары спорт шеберлігі мектебінің шәкірттері.