Ендігі санаулы сәтте еліміздегі 8 мыңнан аса оқу ошағында алғашқы қоңырау соғылады. Бұл – республикамыздағы 4,1 миллион бала үшін жүрек толқытар мерейлі мезет. Олардың 341 мыңы бірінші сыныпқа қабылданса, 232 мыңы осы оқу жылында білім ұясынан үлкен өмірге қанат қағады.
Білім алуға ең алдымен, әлбетте, жақсы жағдай жасалуы керек. Бұл ретте мектептердің құрылысы, орын тапшылығы, жабдықталуы секілді инфрақұрылымдық мәселелер алға шығады. Осыған орай сандарды «сөйлетсек», 1 қыркүйекке 83 жаңа мектеп есік ашады екен. Бұл туралы өткен апталардың бірінде болған Үкімет отырысында Оқу-ағарту министрі Ғани Бейсембаев айтты. Жаңа оқу жылында пайдалануға берілетін оқу ошақтары өз кезегінде 100 мыңнан аса оқушыға жаңа орын сыйлайды.
«Мемлекет басшысының тапсырмалары аясында елімізде мектеп инфрақұрылымын жүйелі түрде жаңғырту және кеңейту жұмыстары жалғасып келеді. Қазір өңірлерде 267 мың орынға арналған 232 мектептің құрылысы жүріп жатыр. 2025–2026 оқу жылының басына дейін 115 мың орынға арналған 83 жаңа мектеп пайдалануға беріледі. Ал жыл соңына дейін тағы 140 мың орынға арналған 111 мектептің құрылысы аяқталады. Мектеп құрылысымен қатар, биыл 190 мың оқушыны қамтитын 245 мектепте ауқымды реновация бағдарламасы іске асырылады. Оның шамамен 60%-ы ауылдық жерлерде орналасқан. Жаңа оқу жылына дейін 99 мың оқушыны қамтитын 127 мектептегі жөндеу жұмыстары аяқталады. Білім беру инфрақұрылымын дамытудың басты басымдығы – балаларға жайлы және қауіпсіз оқу ортасын құру. Бұл жұмыстардың уақытылы және сапалы орындалуы жергілікті жерлердегі жұмысқа тікелей байланысты. Осы бағыттағы жұмысты жандандырып, тиісті бақылауды қамтамасыз ету қажет», деген еді министр. Үкімет таратқан ақпаратқа сүйенсек, 2025 жылы 69 мыңнан астам оқушысы бар 1000-нан астам ауыл мектебі жаңғыртылады, ал 680 мектепке шамамен 1 100 заманауи пәндік кабинет сатып алынады.
Саннан сапа туады. Орта білім ұйымдарына жағдай жасалған сайын ондағы сапаның арта түсетіні де белгілі. Дегенмен мектепте сапаны қалыптастыратын – мазмұн, яғни бағдарлама. Сонымен жаңа оқу жылында педагогтер мен оқушыларды білім жүйесін ілгерілетуге арналған қандай өзгерістер күтіп тұр?
Мектепке дейінгі білім. Жаңа оқу жылынан бастап балалардың мемлекеттік тілді ерте меңгеруіне бағытталған «Тілге бойлау» және бұған дейін еліміздің 5 өңірінде сынақтан өткен «Беске дейін үлгер» бағдарламаларының ауқымын кеңейту басталады. Осы уақыт аралығында 135 балабақшада 7 мыңнан астам бала мемлекеттік тілді меңгеру бағдарламасынан өтті. Мектепке дейінгі ұйымдардағы тәрбие жұмыстарының басым бағыттарының бірі – балаларды ерте жастан еңбекке баулу. Осы мақсатта қыркүйектен бастап 100 балабақшада 12 мың баланы қамтитын қанатқақты жаңа жоба іске қосылады.
Орта білім. «Цифрлық сауаттылық» және «Информатика» пәндеріне жасанды интеллект элементтері енгізіле бастайды. Орта білім жүйесінде AI-ды қолданудың этикалық стандарттары бекітілді. Оқушыларға арналған «Day of AI» онлайн-курстары әзірленді. Сонымен қатар «AI-Kitap» білім беру платформасын кезең-кезеңмен енгізу жоспарда бар. «Адал азамат» біртұтас тәрбие бағдарламасы меншік нысанына қарамастан, елдегі барлық орта білім ұйымына енгізіледі.
Кәсіптік-техникалық білім. Жұмысшы мамандықтар жылы аясында кәсіпорындардың мақсатты тапсырысы бойынша оқып жатқан колледж студенттерінің саны соңғы екі жылда үш есе артты. Биылғы оқу жылында бұл көрсеткішті 45 мың орынға жеткізу көзделген.
Дерек көзі: https://egemen.kz
