Ұлт болашағының негізін қалаушы ұстаздар еңбегі қашанда ерекше бағалануы тиіс. Осыған орай Шымкент қаласында Ұстаздар күніне арналған салтанатты марапаттау рәсімі өтіп, білім саласының үздік қызметкерлері лайықты құрметке бөленді. Бұл мерекелік жиын – педагогтердің қоғамдағы рөлін айқындап, олардың еңбегіне деген шынайы алғыс пен құрметтің көрінісіне айналды.
Іс-шараға Шымкент қаласы әкімінің орынбасары Сәрсен Абайұлы Құранбек пен қалалық мәслихат төрағасы Бахадыр Мәдәліұлы Нарымбетов қатысып, білім беру саласында еңбек етіп жүрген мыңдаған ұстазға жылы лебіздерін білдірді. Шараның атмосферасы ұстаздар еңбегінің қадірін сезіндіретін ерекше әсерге толы болды. Себебі дәл осы мамандық иелері – өскелең ұрпаққа жол көрсетіп, ел болашағын қалыптастырып отырған абыройлы тұлғалар.
Марапаттау барысында қаланың үздік педагогтері еңбектерінің жоғары бағаланғанын сезінді. Білім беру сапасын арттыруға, жас буынды тәрбиелеуге, оқу процесін жаңғыртуға өлшеусіз үлес қосқан мұғалімдер түрлі деңгейдегі марапаттарға ие болды. Атап айтқанда:
9 мұғалім – «Еңбек ардагері» медалімен,
18 мұғалім – «Ы.Алтынсарин» төсбелгісімен,
26 педагог – «Білім беру ісінің құрметті қызметкері» төсбелгісімен,
21 ұстаз – ҚР Оқу-ағарту министрлігінің «Құрмет грамотасымен»,
13 мұғалім – министрліктің «Алғыс хатымен»,
18 педагог – қала әкімі Ғабит Сыздықбековтің «Алғыс хатымен»,
23 ұстаз – қала әкімінің орынбасарының «Алғыс хатымен»,
11 мұғалім – қалалық мәслихаттың «Алғыс хатымен» марапатталды.
Бұл марапаттар – әр мұғалімнің жанкешті жұмысының, адалдығы мен кәсібилігінің нәтижесі. Педагогтардың табандылығы, ұрпақ тәрбиесіне деген жауапкершілігі, әрбір оқушының болашағына әсер ететін еңбегі – қоғам үшін баға жетпес байлық.
Салтанатты рәсімнің соңында қала басшылығы мен ұйымдастырушылар барлық ұстаздарға шынайы алғыс айтып, олардың еліміздің дамуына қосып келе жатқан үлесін ерекше атап өтті. Бүгінгі марапат – тек марапат емес, бүкіл педагогтер қауымына деген қоғамның риясыз құрметі.
Ұстаз – болашақтың сәулесін жаққан шамшырақ. Сондықтан мұндай шаралар олардың еңбегін бағалап қана қоймай, жас мұғалімдерге де шабыт берері анық. Шымкентте өткен бұл мерекелік жиын ұстаз мәртебесін тағы бір биіктетіп, олардың жүрегіне қуаныш сыйлады.
