Қазақстанда педагогтердің кәсіби әлеуетін арттыруға бағытталған «Келешек мектептері» ұлттық жобасы аясында ауқымды жұмыс жүргізілуде. ҚР Оқу-ағарту министрлігі мен «Өрлеу» біліктілікті арттыру ұлттық орталығы ұйымдастырған бұл бағдарлама ел бойынша 7 мыңға жуық ұстазды қамтып отыр. Қазіргі таңда 6 800 педагог LMS цифрлық платформасы арқылы онлайн оқуға қатысуда. Ең белсенді аймақтардың қатарында Шымкент қаласы да бар.
Шымкенттік ұстаздар бастауыш сынып, қазақ, орыс және ағылшын тілдері, математика, физика, химия, биология, информатика, география және тарих пәндері бойынша өз білімдерін жетілдіруде. Курстар мұғалімдердің негізгі жұмысынан қол үзбей өтуіне мүмкіндік береді және заманауи әдістемелер мен педагогикалық тәжірибелерді меңгеруге бағытталған.
«Келешек мектептері» жобасының басты мақсаты — болашақтың мектебі үшін жаңа форматтағы мұғалім даярлау. LMS платформасында оқу материалдарымен қатар, мұғалімдердің кәсіби қиындықтарын айқындайтын диагностикалық тестілер бар. Бұл жүйе ұстаздарға жеке білім траекториясын қалыптастыруға мүмкіндік береді.
Шымкент қалалық білім басқармасының мәліметінше, қала мектептерінен 500-ден астам мұғалім аталған онлайн курсқа қатысып жатыр. Олардың арасында тәжірибелі педагогтермен қатар, жас мамандар да бар. «Бұл курс мен үшін үлкен тәжірибе болды. Сабақ жүргізудің жаңа тәсілдерін, оқушылардың қызығушылығын арттыру жолдарын үйреніп жатырмыз», – дейді Шымкенттегі №78 жалпы орта мектептің мұғалімі Айжан Бекмырзаева.
Курстардың мазмұны халықаралық педагогикалық стандарттарға негізделген. Әр модульде сабақтарды жоспарлау, оқушылардың сыни ойлау қабілетін дамыту және цифрлық құралдарды тиімді пайдалану тәсілдері қарастырылады. Сондай-ақ, қатысушылар платформадағы форумдарда пікір алмасып, өзара тәжірибе бөліседі.
Оқу қорытындысы бойынша әрбір ұстазға кәсіби дамуын жалғастыруға арналған жеке ұсынымдар беріледі. Бұл тәсіл мұғалімдердің тек біліктілігін арттырып қана қоймай, олардың оқу үдерісінде үздіксіз жетілуіне жол ашады.
Айта кетейік, өткен жылы осы бағдарлама аясында ел бойынша 35 мектептің 2 мыңнан астам педагогы арнайы оқудан өткен болатын. Биыл бұл көрсеткіш үш есеге артты. Шымкент қаласы осы жобаны белсенді қолдап отырған өңірлердің бірі ретінде танылып отыр.
Білім саласындағы сарапшылардың пікірінше, «Келешек мектептері» жобасы елдегі педагогикалық тәжірибені жаңа деңгейге көтеріп, мұғалімдердің кәсіби қоғамдастығын қалыптастыруға ықпал етеді. Шымкенттегі білім беру мекемелері бұл өзгерістерге дайын екенін көрсетіп отыр.
Жоба алдағы уақытта да жалғасады. Келесі кезеңде мұғалімдерге арналған офлайн семинарлар, шеберлік сағаттары және тәжірибе алмасу алаңдары ұйымдастырылмақ.
Шымкент қаласында білім сапасын арттыру – басты басымдықтардың бірі. Заманауи педагогтердің кәсіби дамуына салынған әр инвестиция – келешек ұрпақтың интеллектуалды әлеуетіне қосылған үлес.
