Шымкент қаласында білім беру сапасын арттыру мен заманауи оқыту әдістерін енгізу мақсатында «Келешек мектептері» ұлттық жобасы аясында жұмыс істейтін педагогтер біліктілікті арттыру курстарынан өтті. Бұл бастама ҚР Оқу-ағарту министрлігі мен «Өрлеу» біліктілікті арттыру ұлттық орталығының бірлескен жобасы болып табылады.
Қалалық білім басқармасының мәліметінше, Шымкенттегі жаңа үлгідегі 5-ке жуық «Келешек мектебінде» 300-ден астам мұғалім өз кәсіби құзыреттілігін дамыту курстарынан өтті. Курстардың басты мақсаты – педагогтердің инновациялық ойлау қабілетін күшейтіп, заманауи білім беру технологияларын тиімді қолдануға үйрету.
Мұғалімдер LMS онлайн платформасы арқылы бастауыш сынып, қазақ, орыс, ағылшын тілдері, математика, информатика, физика, химия, биология, география және тарих сияқты 11 пән бойынша оқудан өтті. Әр тыңдаушы оқу аяқталған соң қорытынды тест тапсырып, нәтижелеріне қарай кәсіби дамуына бағытталған жеке ұсынымдар алды.
Курс бағдарламасы практикалық бағытта құрылған. Мұғалімдер оқу үдерісінде заманауи платформалармен жұмыс істеуді, жасанды интеллект элементтерін сабақта қолдануды, оқушылардың шығармашылық қабілеттерін дамыту әдістерін меңгерді. Сонымен қатар педагогтерге оқушылардың оқу жетістіктерін саралау мен бағалаудың жаңа тәсілдері де үйретілді.
Алдағы уақытта мұғалімдердің тәжірибе алмасуына бағытталған семинарлар, шеберлік сағаттары мен вебинарлар ұйымдастырылмақ. Сондай-ақ «Өрлеу» орталығы педагогтерге арналған жаңа оқу бағдарламаларын әзірлеуді жоспарлап отыр.
Білім саласының мамандарының пікірінше, мұндай жобалар ұстаздардың кәсіби деңгейін арттырып қана қоймай, білім беру сапасын да жақсартады. «Келешек мектептері» – тек жаңа ғимараттар немесе заманауи жабдықтар ғана емес, ең бастысы, жаңа форматтағы педагогтер қауымдастығын қалыптастырудың негізі.
Шымкент қаласында осы бағыттағы жұмыстар жалғасын тауып, алдағы жылы тағы бірнеше мектептің мұғалімдері біліктілікті арттыру курстарынан өтеді деп күтілуде.
