Мемлекет басшысының білім беру жүйесіне жаңа технологиялар мен жасанды интеллект элементтерін енгізу жөніндегі тапсырмасына сәйкес, бүгінде Шымкент қаласындағы “Келешек мектептері” жобасына қатысушы оқу орындарында жасанды интеллект (AI) тақырыптары оқу бағдарламасына енгізіле бастады. Бұл туралы қала білім басқармасы мен Ы. Алтынсарин атындағы Ұлттық білім академиясының мәліметіне сүйеніп хабарлаймыз.
Жаңа оқу бағыттары аясында “Цифрлық сауаттылық” пен “Информатика” пәндерінің мазмұны жаңартылып, оқушылардың заманауи технологиялармен жұмыс істеу дағдыларын дамытуға бағытталған. Қазірдің өзінде Шымкенттегі бірнеше пилоттық мектепте жасанды интеллект элементтері бар цифрлық шешімдерді тәжірибелік тұрғыда енгізу жұмыстары басталып кетті.
Мәселен, бастауыш сыныптарда сабақтар ойын түрінде, көрнекі құралдар арқылы өтсе, жоғары сыныптарда оқушылар чат-бот құру, деректерді талдау, AI-дың этикалық қолданылу жағдайларын шешу сияқты жобалық тапсырмаларды орындайды. Мұндай тәсіл жастардың сыни ойлауын, ақпараттық мәдениетін және технологияға саналы көзқарасын қалыптастыруға бағытталған.
Қалалық “Келешек мектебі” базасында қазіргі таңда Roqed AI, Aqyl, Google Workspace for Education және Kahoot AI платформалары сынақтан өтуде. Бұл құралдар мұғалімдер мен оқушылар үшін оқу үдерісін барынша интерактивті, көрнекі және әр оқушының қабілетіне бейімделген етуге мүмкіндік беріп отыр.
Шымкент қалалық білім басқармасының цифрландыру бөлімі өкілдерінің айтуынша, AI жүйелерінің енгізілуі оқушылардың бағдарламалау, логикалық ойлау, алгоритм құру қабілетін дамытуға елеулі әсер етеді. Сонымен қатар, жасанды интеллект мұғалімдер үшін де пайдалы көмекшіге айналып келеді — ол оқушылардың үлгерімін талдап, жеке оқу жоспарын ұсынуға мүмкіндік береді.
Ұлттық білім академиясының сарапшысы Әсем Сарыбекованың айтуынша:
“Жасанды интеллект бүгінде тек оқыту құралы ғана емес, сонымен бірге мұғалімнің көмекшісі, ал оқушы үшін ақылды серіктеске айналуда. Біз технологиялар ойлау, коммуникация және жеке жауапкершілік дағдыларын дамытуға қызмет ететін орта қалыптастырып жатырмыз,” — деді ол.
Жаңа технологияларды енгізуде этикалық және қауіпсіздік талаптарына да ерекше көңіл бөлінуде. Ы. Алтынсарин атындағы Ұлттық білім академиясы әзірлеген жасанды интеллектті қолданудың этикалық стандарттары барлық өңірлерге, соның ішінде Шымкент мектептеріне де жолданды. Бұл құжаттарда оқушылардың дербес деректерін қорғау, ақпараттық қауіпсіздік және технологияны жауапты пайдалану қағидалары нақты көрсетілген.
Сонымен қатар, жасанды интеллектті білім беру жүйесіне енгізу барысын қадағалап, әдістемелік көмек көрсететін Этикалық кеңес те құрылды. Кеңес мүшелері мектептердегі процестің ашықтығын, әділдігін және қауіпсіздігін қамтамасыз етуге жауапты болады.
Қаладағы педагогтер үшін де арнайы семинарлар мен оқыту курстары ұйымдастырылуда. Мұғалімдерге жасанды интеллект негізіндегі оқу құралдарын пайдалану, тапсырмаларды автоматтандыру және оқушылардың жетістіктерін цифрлық талдау бойынша тәжірибелік тренингтер өтеді.
Мамандардың пікірінше, “Келешек мектептері” жобасы Шымкенттің білім беру жүйесін жаңа деңгейге көтеріп, жастарды болашақ мамандықтарға ерте бейімдейді. Себебі, қазіргі еңбек нарығында AI технологияларын меңгерген мамандарға сұраныс күн санап артып келеді.
Осылайша, Шымкент қаласы еліміздегі жасанды интеллектті білім беру саласына енгізу бойынша алдыңғы қатарлы өңірлердің бірі болып отыр. “Келешек мектептеріндегі” жаңа форматтағы сабақтар балалардың тек пәндік білімін ғана емес, сонымен қатар инновациялық ойлау, деректермен жұмыс істеу және заманауи технологияларды қауіпсіз пайдалану қабілеттерін дамытуға бағытталған.
