Жаңа оқу жылы қарсаңында Шымкент қаласында жазғы демалыс науқанының қорытындысы жарияланды. Қалалық білім басқармасының мәліметінше, биыл 180 мыңнан астам оқушы жазғы сауықтыру бағдарламаларына қамтылды. Бұл көрсеткіш өткен жылмен салыстырғанда 12 мың балаға артық.
Балалардың тең мүмкіндігін қамтамасыз ету үшін әлеуметтік осал отбасылардан шыққан 25 мыңнан астам оқушы тегін жолдамамен қамтылды. Оның ішінде 500-ге жуық бала «Қазақстан халқына» қорының қолдауымен қала сыртындағы лагерьлерде демалды. Ал 2 мыңнан астам бала Түркістан облысындағы «Балдәурен» оқу-сауықтыру орталығында жазғы демалысын өткізді.
Шымкентте жаз бойы 300-ден астам мектеп жанындағы лагерь жұмыс істеді. Сонымен қатар қалада жыл бойы жұмыс істейтін 2 орталық және 25 маусымдық сауықтыру лагері балаларды қабылдады. Оқушылардың қауіпсіз әрі мазмұнды демалысын қамтамасыз ету мақсатында лагерьлерде медициналық бақылау күшейтіліп, ас мәзірінің сапасына тұрақты мониторинг жүргізілді. Су айдындарында құтқару бекеттері ұйымдастырылып, тәрбиешілерге қосымша нұсқаулықтар берілді.
Балалардың бос уақытын тиімді өткізу үшін STEM-бағыттағы үйірмелер, спорттық сайыстар, арт-терапия сабақтары мен креативті шеберлік сыныптары ұйымдастырылды. Инклюзивті ауысымдар аясында ерекше білім беру қажеттіліктері бар балалар да белсенді қатысты. Жазғы маусымда 6 мыңнан астам тәрбиеші-педагог пен студент-еріктілер балаларға жетекшілік етті.
Ата-аналармен кері байланысты күшейту үшін лагерьлерде арнайы чаттар ашылып, республикалық 111 call-орталығы жұмыс істеді. Келесі жылы қаладағы демалыс орындарын жаңғырту, тәрбиешілердің біліктілігін арттыру және ваучерлік жүйені кеңейту жоспарлануда.
Шымкенттегі жазғы науқанның қорытындысы балалардың денсаулығын нығайтып қана қоймай, олардың жан-жақты дамуына мүмкіндік бергенін көрсетті.
