Соңғы жылдары елімізде жаппай бой көтеріп жатқан «Келешек мектептері» жобасы Шымкент қаласында да қарқынды түрде жүзеге асуда. Қала аумағында салынып жатқан жаңа үлгідегі мектептер шаһардағы үш ауысымды оқуды жоюға және білім сапасын арттыруға бағытталған.
Жаңа форматтағы мектептердің артықшылықтары
«Келешек мектептері» — тек заманауи ғимарат емес, білім беру мазмұны мен басқару жүйесі жаңаша құрылады. Әр мектепте кең аулалар, төрт спорт залы, жарық әрі жайлы сыныптар қарастырылған. Құрылысы стандартты мектептерге қарағанда 5–20 пайызға үлкен, сонымен бірге IT-технологиялар мен STEM-зертханалар, ағаш өңдеу және тігін үйірмелері бар. Бұл оқушыларды ерте жастан кәсіптік бағдарға бейімдеуге мүмкіндік береді.
Мектептердің сыйымдылығы да ерекше – әрқайсысы 2 000 балаға дейін қабылдай алады. Бұл Шымкент сияқты қарқынды өсіп келе жатқан мегаполисте аса өзекті мәселені шешуге көмектеспек.
Білім сапасына жаңа серпін
Оқу бағдарламалары Ы.Алтынсарин атындағы Ұлттық білім академиясының қолдауымен жүйелі түрде әзірленуде. Мұғалімдерді іріктеу арнайы №57 бұйрық негізінде жүргізіліп, кәсіби даярлығы жоғары педагогтер таңдалады. Сонымен қатар, «Өрлеу» ұлттық орталығы арқылы әдістемелік қолдау көрсетіліп, жас мамандарды жаңа форматтағы оқу үдерісіне бейімдеу жұмыстары жүргізіледі.
Шымкенттегі білім басқармасының дерегінше, мұндай мектептерде тәжірибе жинақталып, кейіннен қаладағы басқа оқу орындарына таратылатын болады. Бұл жалпы білім беру жүйесіне ұзақ мерзімді тиімділік әкелмек.
«Жайлы мектептен» – «Келешек мектебіне»
Бастапқыда «Жайлы мектеп» деп аталған жобаның мақсаты тек инфрақұрылымды жақсартуға бағытталды. Ал бүгінде жаңа кезеңде бұл білім сапасын арттыруға, оқушының ой-өрісін кеңейтуге, қоғамға қажетті құзыреттерді қалыптастыруға бағытталған «Келешек мектебі» тұжырымдамасына ұласуда.
Мәжіліс депутаты Нұргүл Тау атап өткендей, «Жайлы мектеп» тек жайлылық пен технологияны білдірсе, «Келешек мектебі» – елдің болашағына қызмет ететін сапалы білім мен тәрбиенің символы болуы тиіс.
Шымкенттің үлесі
Қалада салынып жатқан «Келешек мектептері» жаңа оқу жылында пайдалануға беріліп, мыңдаған баланың сапалы білім алуына жол ашады. Заманауи лабораториялар, медиатекалар мен арнайы жабдықтар оқушылар үшін қолжетімді болып, педагогтер тарапынан белсенді қолданылған жағдайда бұл мектептер Шымкенттің білім беру саласында шынайы өзгеріс әкелетіні сөзсіз.
