2025–2026 оқу жылы қарсаңында Шымкент қаласындағы білім беру ұйымдарының дайындық жұмыстары министрлік пен жергілікті билік өкілдерінің жіті бақылауына алынды. ҚР Оқу-ағарту министрінің тапсырмасымен өңірлерге жіберілген жұмыс топтары мектептердің жаңа оқу жылына толық дайын болуын тексеріп жатыр.
Ел бойынша биыл шамамен 300 мың оқушыға арналған 200-ден астам жаңа мектеп ашу көзделген. Оның ішінде 112 мектеп «Келешек мектептері» ұлттық жобасы аясында салынып, 206 мың орын ұсынылмақ. Бұл бастама Шымкенттегі үш ауысымды оқытуды жоюға, апатты мектептердің мәселесін шешуге және оқушы орындарының тапшылығын қысқартуға ықпал етеді. Қалалық білім басқармасының мәліметінше, тек Шымкенттің өзінде жаңа оқу жылына дейін бірнеше ірі мектептің құрылысы аяқталып, пайдалануға беріледі.
Сонымен қатар қолданыстағы мектептерді жаңғырту жұмыстары қарқын алған. Қаладағы ондаған білім ордасында шатырлар ауыстырылып, қасбеттер жаңартылып, инженерлік желілерге күрделі жөндеу жүргізілуде. Мектеп ауласы абаттандырылып, көгалдандыру жұмыстары да қатар жүріп жатыр. Бұдан бөлек, 1000-нан астам ауылдық мектепке жөндеу жұмыстары жасалып, кітапханалар мен асханалар жаңартылуда. Шымкент мектептеріне де жаңа жиһаздар жеткізіліп, қауіпсіздік жүйелері күшейтілді.
Биыл ерекше көңіл бөлінген бағыттардың бірі – заманауи пән кабинеттерімен қамтамасыз ету. Химия, физика, биология, робототехника және STEM бағытындағы 1000-ға жуық жаңа кабинет сатып алынды. Бұл оқушылардың ғылым мен технологияға деген қызығушылығын арттырып, тәжірибелік білім алуына мүмкіндік береді.
Жұмыс топтарының басты назарында балалардың қауіпсіздігі тұр. Мектептердегі жылу жүйесі, өрт және сейсмикалық қауіпсіздік талаптары, бейнебақылау, интернет жылдамдығы мен электронды күнделік дайындығы мұқият тексерілуде. Нәтижелер ашық дашбордта жарияланып, ата-аналарға call-орталық пен жедел желі арқылы өз ұсыныс-шағымдарын жолдау мүмкіндігі берілген.
Министр Ғани Бейсембаевтың айтуынша, білім саласындағы мемлекеттік бағдарламалардың сапалы әрі уақытылы орындалуы – басты міндет. «Біз балалардың қауіпсіздігіне және қолайлы ортаға ерекше көңіл бөлуіміз керек. Әрбір мектеп жаңа оқу жылына толық дайын болуы тиіс», – деді ол.
Шымкенттегі тексеріс нәтижелері көрсеткендей, дайындық қарқыны жоғары. Жаңа оқу жылында оқушыларды күтіп тұрған мектептер – тек білім ошағы ғана емес, заманауи, қауіпсіз әрі мейірімді ортаға айналмақ.
