Жазғы демалыс кезінде бірінші сыныпқа баратын балаларға бірдей бастапқы мүмкіндік беру мақсатында мектепалды дайындыққа арналған «Балақайлар мектебі» қысқа мерзімді бағдарлама ұйымдастырылды. Бұл туралы Оқу-ағарту министрлігінің баспасөз қызметі хабарлайды.
Бағдарлама мектепке дейінгі білім беру мен бастауыш мектеп арасындағы сабақтастықты қамтамасыз етеді, балаларды мектепке дейінгі тәрбие мен оқытудың үлгілік оқу бағдарламасының бағыттары бойынша мектепке алдын ала дайындауға мүмкіндік береді.
Аталған бағдарлама мемлекеттік жалпыға міндетті мектепке дейінгі тәрбие мен білім беру стандартына сәйкес әзірленді.
«Жазғы үш ай ішінде бастауыш сынып мұғалімдерінің қатысуымен 90 мыңға жуық мектепке дейінгі жастағы бала қысқа мерзімді дайындықтан өтті. Оның ішінде қалаларда шамамен 60 мың, ауылдық жерлерде 30 мыңнан астам бала қамтылды. Оқыту барысында балалардың физикалық, коммуникативтік, интеллектуалдық, шығармашылық және әлеуметтік-эмоционалды дағдыларын дамытуға, сондай-ақ мектепке оң көзқарасын қалыптастыруға басымдық берілді», – дейді Мектепке дейінгі білім беру департаментінің директоры Манар Адамова.
Айта кетейік, мектепалды дайындық бағдарламасы 1 айға есептелген. Білім беру процесін білікті бастауыш сынып мұғалімдері немесе мектепалды даярлық педагогтері жүргізді.
Бағдарлама мазмұны сауат ашуға дейінгі дағдыларды (фонемалық есту, дыбысты ажырату), математика негіздерін, логикалық және кеңістіктік ойлауды, ұсақ моториканы, цифрлық гигиена мен қауіпсіздікті қамтыды. Сабақтар ойын, станция, микро-топ форматында өтті, аптасына 4–5 рет, 60–90 минуттан. Әр балаға «бейімделу картасы» толтырылып, психолог пен логопед қажетіне қарай сүйемелдеу көрсетті. Ата-аналарға үйде бірлесіп орындауға арналған ойын-жаттығулар мен қысқа нұсқаулықтар берілді. Инклюзивті топтарға бейімделген материалдар мен визуалды қолдау ұсынылды. Қорытындыда скрининг жүргізіліп, портфолио жасақталды және 1-сынып мұғаліміне жеке ұсынымдар жолданды.
