Мемлекет басшысының тапсырмасына сәйкес, 2025 жылдан бастап елімізде қосымша білім беру ұйымдарына ваучерлік қаржыландыру жүйесі кезең-кезеңімен енгізілуде. Бұл бастама әрбір баланың шығармашылық және спорттық қабілеттерін дамытуға тең мүмкіндік жасауға бағытталған.
Пилоттық жоба еліміздің алты өңірінде, соның ішінде Шымкент қаласында да жүзеге асырылуда. Қалада ата-аналар өз балалары үшін түрлі үйірмелер мен секцияларды таңдауға мүмкіндік алды. Енді мектептен тыс білім беру қызметтерін таңдау кезінде құжат жинау немесе әкімшілік кедергілер болмайды — бәрі «бір балаға – бір ваучер» қағидаты бойынша онлайн форматта жүргізіледі.
Оқу-ағарту министрлігінің Тәрбие және қосымша білім беру департаменті басқармасының басшысы Алтай Рахимберлиннің айтуынша, бүгінгі күні 300 мыңнан астам бала қосымша білім алуға арналған ваучер иеленген.
«Ата-аналар өз балаларының қызығушылығына қарай үйірме мен секцияны өздері таңдай алады. Қажет болған жағдайда олар үйірмені құжаттарды қайта тапсырмай-ақ өзгерте алады. Бұл ретте ваучер өз күшінде қалады», — дейді ол.
Жаңа тетік балалардың шығармашылық, спорттық және зияткерлік дамуын қамтамасыз етіп қана қоймай, қаржыландырудың ашықтығын да арттырады. Әрбір балаға бөлінетін қаражат тікелей таңдалған ұйымға бағытталып, бюджет қаражатының мақсатты жұмсалуын бақылауға мүмкіндік береді.
Шымкент қаласында бұл жобаға алғашқы кезеңде 70-ке жуық қосымша білім беру ұйымы қатысуда. Оның ішінде спорттық секциялар, өнер мектептері, робототехника, IT және тіл үйрету орталықтары бар. Қала әкімдігінің білім басқармасы мәлімдегендей, 2025 жылдың соңына дейін ваучерлік жүйе арқылы 20 мыңнан астам шымкенттік оқушы тегін үйірмелерге қатысуға мүмкіндік алады.
Мұндай жүйе білім беру саласындағы әлеуметтік әділдікті қамтамасыз етеді. Бұған дейін қосымша сабақтар мен шығармашылық бағыттағы үйірмелерге қатысу тек белгілі бір әлеуметтік топтағы отбасыларға ғана қолжетімді болса, енді бұл мүмкіндік барлық балаға тең дәрежеде беріледі.
Айта кетейік, ваучерлік қаржыландыру жүйесін енгізу жобасы Мәдениет және ақпарат, Туризм және спорт, Оқу-ағарту, сондай-ақ Жасанды интеллект және цифрлық даму министрліктерімен бірлесіп жүзеге асырылуда.
Шымкент қаласының қосымша білім беру ұйымдары қазіргі таңда цифрлық платформа арқылы тіркеуден өтіп, ваучер жүйесіне бейімделу үстінде. Бұл процесс толық ашық әрі автоматтандырылған, сондықтан ата-аналар жүйеге кіріп, балаларына арналған үйірмелер мен курстарды онлайн таңдай алады.
Жаңа жүйе балалардың шығармашылық әлеуетін дамытуға, бос уақытын тиімді өткізуге және кәсіби бағдар алуына үлкен серпін бермек. Сонымен қатар, бұл бастама мемлекет тарапынан балалар мен жасөспірімдердің жан-жақты дамуына деген қамқорлықтың нақты көрінісі болып отыр.
Шымкент қаласы әкімдігінің мәліметінше, келесі кезеңде бұл бағдарлама аясында жас дарындарды қолдау, әлеуметтік осал отбасылардың балаларына басымдық беру және ерекше білім беру қажеттілігі бар балаларға арналған бағыттарды кеңейту қарастырылуда.
Бұл бастама – еліміздің білім беру жүйесіндегі жаңа кезеңнің бастауы. Ваучерлік тетік арқылы әрбір бала өз әлеуетін ашуға мүмкіндік алып, «тең мүмкіндік – ортақ табыс» қағидаты нақты іске асып келеді.
