Шымкентте білім берудегі өзгерістер көшбасшылары қалыптасып келеді.Елімізде білім саласын жаңа деңгейге көтеруді көздейтін «Білім берудегі өзгерістердің 1000 көшбасшысы» стратегиялық жобасы аясында Шымкент қаласынан ондаған педагог қорытынды бағалаудан сәтті өтті. Бұл туралы ҚР Оқу-ағарту министрлігі хабарлады.
2023 жылдан бастап жүзеге асып келе жатқан бұл бастама Мемлекет басшысы Қасым-Жомарт Тоқаевтың тапсырмасымен қолға алынған. Жобаның басты мақсаты — заманауи ойлайтын, басқарушылық қабілеті жоғары, жаңашыл көзқарастағы мектеп директорлары мен білім саласының менеджерлерін даярлау.
Бүгінге дейін Қазақстан бойынша 583 педагог резервист атанып, олардың 400-ден астамы конкурстан тыс түрде басшылық қызметке тағайындалды. 40 директор қазір «Келешек мектептері» ұлттық жобасы аясында ашылған жаңа үлгідегі білім ошақтарын басқарып отыр. Нәтижесінде республикада мектеп директорларының тапшылығы үш есеге қысқарды.
2025 жылы жобаның жаңа кезеңі аясында тағы 428 үміткер оқудан өтті. Олардың қатарында Шымкент қаласының білім басқармасына қарасты мектептердің басшылар мен директор орынбасарлары да бар. «Назарбаев Зияткерлік мектептері» Педагогикалық шеберлік орталығы базасында өткен оқу 21 шілдеде басталып, 12 қыркүйекте аяқталды.
Бағдарламаға қатысушылар бірнеше кезеңнен тұратын іріктеуден өтіп, үш деңгейлі дайындық жүйесін аяқтаған соң қорытынды бағалауға жіберілді. 15–26 қыркүйек аралығында өткен бұл кезеңде педагогтер өздерінің тәжірибесін талдап, «рефлексивті есеп» жазды. Онда олар алған білімдері мен басқарушылық дағдыларын нақты мысалдармен дәлелдеуі тиіс болды.
Жиналған материалдар белгіленген критерийлер бойынша сараланып, «Назарбаев Зияткерлік мектептері» ДББҰ Педагогикалық өлшеулер орталығының сыртқы сараптамасынан өтті. Қорытындысында 411 маман жоғары нәтижеге қол жеткізіп, министрлік жанындағы комиссиямен сұхбаттасуға жолдама алды.
Шымкенттік қатысушылардың арасында да табысты нәтижеге жеткендер көп. Қаладағы бірнеше білім беру ұйымының өкілдері енді кадрлық резервке қосылып, болашақта мектеп басшысы лауазымына тағайындалу мүмкіндігіне ие болды. Бұл өз кезегінде Шымкенттегі білім беру сапасын басқару мәдениетін жаңа деңгейге көтеруге ықпал етпек.
Айта кетейік, жобаны сәтті аяқтаған және кадрлық резервке енген педагогтер бос тұрған мектеп директорлары лауазымына конкурстан тыс тағайындала алады. Бұл – кәсіби әлеуеті жоғары, заманауи ойлайтын мамандарға жол ашатын ерекше мүмкіндік.
Білім саласындағы мұндай бастамалар Шымкенттегі жас басшылардың жаңа буынын қалыптастырып, мектептерді тиімді басқару жүйесін нығайтады. Педагогикалық көшбасшылардың артуы — оқушылардың сапалы білім алуына, мұғалімдердің дамуына және жалпы қаланың білім беру экожүйесінің жетілуіне үлкен серпін береді.
Шымкент — білім мен жаңашылдықтың қаласы. Бүгінде мұнда өз ісіне адал, кәсіби тұрғыда өсуге ұмтылған педагогтер буыны қалыптасып келеді. Олар еліміздің білім беру жүйесіне жаңа леп әкеліп, болашақ ұрпаққа бағыт-бағдар беретін көшбасшыларға айналуда.
