Астана қаласындағы Л.Н. Гумилев атындағы Еуразия ұлттық университетінде қазақ тілінен «Ана тілі» республикалық зияткерлік олимпиадасының жеңімпаздарын марапаттау рәсімі өтті.
Биыл алғаш рет ұйымдастырылған бұл жобаны Халықаралық «Қазақ тілі» қоғамы мен «Білім-Инновация» халықаралық қоғамдық қоры бірлесе жүзеге асырды.
Салтанатты шараға мемлекет және қоғам қайраткерлері, депутаттар, тіл жанашырлары мен қазақ тілін қолдаушы кәсіпкерлер қатысты.
Іс-шараға ҚР Ғылым және жоғары білім министрлігі Тіл саясаты комитетінің төрағасы Ербол Ердембекұлы Тілешов қатысып, жеңімпаздарға марапаттар тапсырды.
«Ана тілі» олимпиадасының басты мақсаты – қазақ тілін жастар арасында кеңінен насихаттау, оны ғылым мен білім тіліне бағыттау, сондай-ақ оқушылардың оқу сауаттылығы мен жазу мәдениетін арттыру.
Олимпиаданың ақтық кезеңіне 64 командадан құралған 192 оқушы Астана қаласына келді. Қатысушылар «Пікірсайыс», «Тілшілер», «Білімпаздар» атты үш негізгі бағыт бойынша сайысқа түсіп, бақтарын сынады.
Олимпиаданың бас жүлдесін Түркістан облысынан келген «Достық» командасы жеңіп алды. Олимпиаданың барлық қатысушыларына сертификаттар мен сыйлықтар тапсырылды.
Ұйымдастырушылардың мәлімдеуінше, биылғы дода барысында әділқазылар алқасы тілдік норманы сақтауға, ой дәлдігі мен дереккөзге сүйенген пайымға, шығармашылық стиль мен медиа сауатқа басымдық берді. «Пікірсайыс» бағыты логикалық дәлел мен қарсы уәжге жауап беру машығын тексерсе, «Тілшілер» – репортаж, сұхбат, аналитикалық мақаланы қысқа мерзімде әзірлеуді бағалады. «Білімпаздар» іріктеуінде орфография, пунктуация, терминқор және мәтінмен жұмысқа арналған тапсырмалар берілді. Жарыс аясында ЕҰУ оқытушылары мен тіл мамандары шеберлік сағаттарын өткізіп, эссе жазудың заманауи әдістері, подкаст пен қысқа бейнеролик сценарийін құру бойынша тәжірибе бөлісті.
Ең үздік қатысушыларға «Үздік шешен», «Үздік тілші», «Үздік редакциялау» сияқты арнайы номинациялар табысталды. Олимпиада материалдары ашық платформада жарияланып, мектептерге әдістемелік құрал ретінде жолданбақ. Келесі жылдан бастап өңірлік іріктеу кезеңдерін көбейтіп, жобаны тұрақты жылдық форматқа көшіру көзделуде.
