Бұл туралы бүгін Президент ұстаздардың Республикалық тамыз конференциясында айтты.
«Биыл білім беру саласына 13 мыңнан астам грант бөлінді. Педагог мамандығы бойынша оқып жатқан студенттердің шәкіртақысы бес жылда екі есе көбейді. Жаңа оқу жылынан бастап шәкіртақы 84 мың теңге болады.
Осындай нақты шаралардың нәтижесінде жастардың мұғалім болуға ынтасы артып келеді.
Былтыр 1800-ге жуық «Алтын белгі» иегері педагог мамандығына оқуға түскен. Ал, биыл 2 мыңнан астам үздік түлек ұстаз мамандығын таңдап отыр. Бұл – барлық «Алтын белгі» иегерлерінің 23 пайызға жуығы деген сөз. Мұның бәрі қоғамда ұстаздардың абырой-беделінің арта түскенін аңғартады. Мұғалімнің білігін, мәртебесін көтеру және білім сапасын арттыру үшін басқа да көптеген шаралар атқарылды. Нәтижесі жаман емес.
Биыл оқушыларымыз әлемдегі ең беделді жеті олимпиададан 27 медаль алды. Бұдан бөлек, халықаралық олимпиадалардан 1000-ға жуық медаль иеленді. Бұл, әрине, ұл-қыздарымыздың сапалы білімі мен терең ізденісі және ұстаздардың қажырлы еңбегінің жемісі.
Мен жақында осындай бір топ оқушыны Ақордаға арнайы шақырып, марапаттадым. Олар қазақтың зияткер ұлт екенін бүкіл әлемге танытып жүр.
Жалпы, нақты жетістіктер аз емес. Бірақ, арқаны кеңге салуға болмайды. Себебі, алда атқарылатын шаруа одан да көп. Осы орайда, бүгін оқу-ағарту саласына қатысты бірқатар ойымды ортаға салғым келеді», деді Қасым-Жомарт Тоқаев.
Мемлекет басшысы алдағы кезеңде педагогтердің үздіксіз кәсіби дамуын, ауыл мектептерін қолдау мен инфрақұрылымды жаңғыртуды, бағдарламалардың заманауи экономика сұранысына сәйкестігін басты назарда ұстау қажеттігін атады. Цифрлық ресурстар мен ЖИ элементтері жауапты қолданылып, академиялық адалдық күшейтіледі. Университет–мектеп–өндіріс байланысын тереңдету, жас мұғалімдерге менторлық пен әлеуметтік қолдау тетіктерін кеңейту ұсынылды. Президент білім сапасын арттыру – барша қоғамның ортақ міндеті екенін айтып, ұстаздар қауымына жаңа оқу жылында тың серпінмен жұмыс істеуге шақырды.
Дерек көзі: https://egemen.kz
