Шымкент – қонақжайлылығымен және ерекше тағамдарымен талай жанның жүрегін жаулап алған қала. Мұндағы асхананың алуан түрлілігі ғасырлар бойы қалыптасқан дәстүр мен түрлі мәдениеттердің тоғысынан сыр шертеді.
Қазақтың кең пейілі мен ас дайындау өнері үндескен бұл шаһарда әр тағамның өзіндік тарихы мен ерекше дәмі бар. Бүгін әл-Фараби алаңында өткен мерекелік шара осы бай мұраны тағы бір мәрте паш етті. Шебер аспаздар өз өнерлерін көрсетіп, көпшілікке дәмі тіл үйірер тағамдарын ұсынды. Көпшілік асыға күтетін бұл фестиваль нағыз мерекелік көңіл-күй сыйлады.
2022 және 2023 жылдары үлкен жетістікке жеткен «ДәмДәсTour» фестивалі биыл да жалғасын тауып, қаланың басты гастрономиялық шарасына айналды. Биылғы фестивальға 50-ден астам қоғамдық тамақтандыру орны қатысып, ерекше тағамдарын ұсынды. Іс-шараға қала әкімі Ғабит Сыздықбеков арнайы келіп, аспаздардың туындыларымен және қолөнер шеберлерінің бұйымдарымен танысты.
Фестивальдің басты жаңалығы – салмағы 24 келі болатын алып тандыр самсаның дайындалуы. Бұл – елімізде алғаш рет әзірленген ең үлкен самса. Қазақстан рекордтар кітабының ресми өкілі Бақытжан Сәбитұлы бұл оқиғаның ерекше екенін атап өтті.
– Бүгін бұрын-соңды болмаған рекорд орнатылуда. Шымкент өзінің гастрономиялық астана екенін тағы бір мәрте дәлелдеп отыр, – деді ол.
Алып самсаны әзірлеген «Камал ата» асүйінің бас аспазы Немат Нархожаев бұл тағамды дайындауға екі апта дайындалғанын және оның оңай болмағанын айтты.
– Рецепт пен дайындау тәсілін өзгертпедік, тек көлемін үлкейттік. Бастапқыда үй жағдайында 17 келілік самса жасап көрдік, сәтті шықты. Ал көпшілікке ұсынған нұсқамыз 24 келі болды, – деді бас аспаз.
Фестиваль тек тағамдармен шектелмей, ерекше мотоспорттық шаралармен де толықты. Қырғызстан, Өзбекстан, Тәжікстан және басқа да аймақтардан келген мотобайкерлер Шымкентке арнайы келіп, әсерлі мотошеру мен мотошоу өткізді.
100-ден астам мотобайкер қала көшелерімен сәнді шеру жасап, іс-шараға көрік қосты. Кеш барысында қала тұрғындары мен қонақтары эстрада жұлдыздарының концертін тамашалап, кеш соңында ұйымдастырылған кәсіби отшашу мен алау шоуынан ұмытылмас әсер алды.
