Шымкент қаласының шағынаудандары мен елді мекендерін табиғи газбен қамту жұмыстары кезең-кезең бойынша жүзеге асырылуда. Бүгін ҚР Энергетика вице-министрі Әлібек Жамауов, Шымкент қаласының әкімі Ғабит Сыздықбеков Достық шағынауданында тұрғындарды газға қосу іс-шарасына қатысты.
Шағынауданында газбен қамтамасыз етудің 3-кезеңі бойынша 2024 жылы құрылыс жұмыстары басталған болатын. Мердігер мекеме 2025 жылы наурыз айында құрылыс жұмыстарын аяқтады. Оның нәтижесінде, 320 абонент (1600 адам) табиғи газға қосылуға мүмкіндік алды.
Өткен жылы қала әкімінің тұрғындармен кездесуі барысында аталған аумақты 2025 жылы газға қосуға тапсырма берілген еді. Қала әкімі шағынауданды толық газдандыру жұмысын жеделдету қажеттігін міндеттеді.
Шағынаудандағы 320 абонент 2016 жылдан бері табиғи газсыз отырды. Уәде етілгендей, 320 абонент биыл, өз мерзімінде көгілдір отынмен қамтылып отыр. Тұрғындарды газбен қамту азаматтардың өмір сапасын арттыруға септігін тигізеді.
Шаһар басшысы қазіргі уақытта газға қосылуға өтінімдер қабылдау басталғанын айтты. Газды үйлерге қосу үшін тұрғындар құжаттарды жинауы қажет. Алдымен QazaqGaz Aimaq тарапынан берілетін техникалық шарттардан бастау керек. Оларды eGov mobile мобильді қосымшасы арқылы өтініш беріп алуға болады.
Қала тұрғындары табиғи газға қол жеткізгендеріне, жалпы атқарылған жұмыстарға өз ризашылықтарын жеткізді.
