1 тамызда Астана Арена алаңында әлемдік жұлдыз Дженнифер Лопестің концерті өтеді. Бұл шара қалаға 15 мыңнан астам турист тартуы мүмкін және 6,5 миллиард теңге көлемінде экономикалық пайда әкеледі, деп хабарлайды Citynews.kz сайты NewTimes.kz ақпарат агенттігіне сілтеме жасап.
Бұл туралы Үкімет отырысында «Астана Концерт» компаниясының продюсері Малик Хасенов мәлімдеді. Оның айтуынша, Дженнифер Лопестің концерті Астананы әлемдік деңгейдегі гастрольдік картаға шығарады.
«Концерт коммерциялық негізде ұйымдастырылып отыр. Біз бұл шараның қала экономикасына 6,5 миллиард теңге табыс әкелетінін күтіп отырмыз. Астанаға 15 мыңнан астам турист келеді, бұл өз кезегінде қаланың инфрақұрылымы мен сервистік саласының дамуына серпін береді», — деді Хасенов.
Сондай-ақ, ол Қазақстанның Орталық Азиядағы оқиғалық туризм бойынша көшбасшы болуға әлеуеті бар екенін атап өтті. Жақын үш жылда қала әкімдігімен бірлесіп әлемдік деңгейдегі 10 концерт өткізу жоспарланып отыр.
Бұл бастамалар Астананы аймақтағы ірі оқиғалық туризм орталығына айналдырып, жаңа инвестициялар тартуға мүмкіндік береді.
