Отырар ауданы прокуратурасының ұйымдастыруымен аудандық мәдениет үйінде «Заң мен тәртіп» тұжырымдамасы аясында «Лудомания – қоғам дерті» тақырыбында кеңейтілген форум өткізілді. Іс-шараның негізгі мақсаты – қоғамда кең таралып келе жатқан құмар ойындарға тәуелділіктің алдын алу, жастардың құқықтық сауаттылығын арттыру, интернет алаяқтық, қаржылық пирамидалар, жалған ақпараттар мен суицидтік әрекеттердің алдын алу бағытында түсіндіру жұмыстарын жүргізу болды.
Форумға аудан әкімдігі, аудандық білім бөлімі, аудандық полиция бөлімі, прокуратура қызметкерлері, аудан имамы, мектеп мұғалімдері, жастар және мектеп оқушылары қатысты. Жиын барысында қоғамда алаңдаушылық туғызып отырған өзекті мәселелер жан-жақты талқыланып, жасөспірімдер арасындағы құқықбұзушылықтың алдын алу мәселесіне ерекше назар аударылды.
Форум барысында сала мамандары құмар ойындардың адам психологиясына кері әсері туралы кеңінен айтып өтті. Мамандардың айтуынша, лудомания адамның ерік-жігерін әлсіретіп, қоғамнан оқшаулануына, агрессияға бейім болуына, тіпті өз-өзіне қол жұмсау әрекеттеріне дейін алып келуі мүмкін екені түсіндірілді. Осыған байланысты жастар арасында түсіндіру жұмыстарын күшейту, ата-аналардың жауапкершілігін арттыру және бос уақытты тиімді ұйымдастыру маңызды екені айтылды.
Іс-шара барысында аудандық мәдениет үйі қызметкерлерінің қатысуымен арнайы сахналық қойылымдар көрсетілді. Қойылымдарда құмар ойындардың адам өміріне тигізетін зардаптары, отбасылық құндылықтардың бұзылуы, жасөспірімдердің құқықбұзушылыққа баруы және заң алдындағы жауапкершілік мәселелері көрініс тапты. Театрландырылған қойылымдар форум қатысушыларына ерекше әсер қалдырды.
Сонымен қатар форумда кәмелетке толмағандар арасындағы құқықбұзушылықтың, буллингтің, интернет алаяқтықтың және суицидтік әрекеттердің алдын алу мәселелері кеңінен қозғалды. Қазіргі таңда әлеуметтік желілер мен интернет кеңістігінде жалған ақпараттардың таралуы, адамдардың психологиясына әсер ету, қаржылық пирамидалардың белсенді жарнамалануы қоғам үшін үлкен қауіп төндіріп отырғаны айтылды. Осыған байланысты құқық қорғау органдары тұрғындарды сақ болуға, күмәнді сілтемелерге өтпеуге және жеке мәліметтерін бөгде адамдарға бермеуге шақырды.
Аудандық полиция бөлімінің өкілдері интернет алаяқтықтың көбейгенін атап өтті. Әсіресе әлеуметтік желілер арқылы жеңіл табыс ұсынатын жалған инвестициялық жобалар мен қаржылық пирамидаларға алданып жатқан азаматтардың саны артқаны айтылды. Мамандар мұндай схемалардың артында алаяқтар тұратынын түсіндіріп, тұрғындарды қаржылық сауаттылықты арттыруға үндеді.
Форум барысында аудан имамы жастар тәрбиесі, рухани құндылықтар және отбасының қоғамдағы рөлі туралы тағылымды ойларымен бөлісті. Өз сөзінде адам өмірінің қадірі, адал еңбек пен дұрыс тәрбие жайында айтып, жастарды жаман әдеттерден аулақ болуға шақырды. Сонымен қатар ата-аналардың бала тәрбиесіндегі жауапкершілігіне ерекше тоқталып, ұрпақ тәрбиесі – қоғам болашағы екені атап өтілді.
Іс-шара аясында білім саласының мамандары оқушылар арасында психологиялық қолдау жұмыстарын күшейту, құқықтық сауаттылықты арттыру және тәрбие жұмыстарын жүйелі жүргізу қажеттігін жеткізді. Мектеп психологтарының қатысуымен оқушыларға өмірлік қиын жағдайларда көмек сұраудың маңыздылығы түсіндірілді. Жасөспірімдерге түрлі қиындықтарға тап болған жағдайда ата-аналармен, ұстаздармен және мамандармен ашық сөйлесу қажеттігі айтылды.
Форумның негізгі ерекшеліктерінің бірі – еркін пікір алмасу алаңының ұйымдастырылуы болды. Оқушылар мен жастар өздерін толғандырған сұрақтарын қойып, сала мамандарынан жан-жақты жауаптар алды. Әсіресе интернет қауіпсіздігі, заң алдындағы жауапкершілік, психологиялық көмек алу жолдары және зиянды әдеттердің алдын алу бағытындағы сұрақтар көп көтерілді.
Мамандар қоғамдағы келеңсіз құбылыстардың алдын алу тек құқық қорғау органдарының ғана емес, бүкіл қоғамның ортақ міндеті екенін атап өтті. Жастардың саналы, білімді әрі отаншыл болып қалыптасуы үшін отбасы, мектеп және қоғам бірлесе жұмыс істеуі қажет екені айтылды. Осындай профилактикалық іс-шаралар арқылы жастар арасында құқықтық мәдениетті қалыптастыруға және зиянды әдеттердің алдын алуға мүмкіндік мол екені жеткізілді.
Форум қорытындысында қатысушылар қоғамдағы лудомания, интернет алаяқтық, қаржылық пирамидалар, жалған ақпараттар және суицидтік әрекеттердің алдын алу бағытындағы жұмыстарды алдағы уақытта да тұрақты түрде жалғастыру қажеттігін атап өтті. Сонымен қатар жастарды салауатты өмір салтын ұстануға, бос уақытын тиімді пайдалануға және білім мен тәрбиеге басымдық беруге шақырды.
Аталған іс-шара қоғамдағы өзекті мәселелерді кеңінен талқылауға мүмкіндік беріп, жастардың құқықтық сауаттылығын арттыруға және зиянды әрекеттердің алдын алу бағытындағы жұмыстарды күшейтуге ықпал етті.
