2022-09-28 02:04:02
12.3 C
Шымкент

Көп қаралғандар

Шымкентте «Таза қала» акциясы басталды

Жыл сайын дәстүрге айналған «Таза қала» акциясы биыл да Азаматтық альянс қоғамдық ұйымының бастамасымен жалғасын таппақ.

Қоғамдық ұйымның өкілі Юсуп Арзыхановтың айтуынша, акцияға қатысуға қаланың барлық тұрғындары өтініш білдіре алады. Жас ерекшеліктеріне ешқандай шектеу жоқ.

–ҮМІТКЕР АРНАЙЫ ӨТІНІШ ҚАҒАЗЫН ТОЛТЫРЫП, АУДАНДЫҚ ӘКІМДІККЕ ТАПСЫРАДЫ. ҚАЛАНЫҢ ТӨРТ ӘКІМДІГІНЕН ҚҰРАЛҒАН ЖҰМЫС ТОБЫ АЙЫНА ЕКІ РЕТ ҮМІТКЕРЛЕРДІҢ ТАЗАЛЫҚ ЖҰМЫСТАРЫНА МОНИТОРИНГ ЖАСАП, АЙ САЙЫН АУМАҚТЫ ФОТО, ВИДЕОҒА ТҮСІРІП, ӘР АУДАН ӨЗІНІҢ ЖЕҢІМПАЗДАРЫН АНЫҚТАЙДЫ. АЛ ҚОРЫТЫНДЫ НӘТИЖЕНІ КОМИССИЯ ШЫҒАРЫП, КІМНІҢ ЖҮЛДЕГЕР АТАНҒАНЫ ҚАЗАН АЙЫНДА БЕЛГІЛІ БОЛАДЫ. БАЙҚАУ ЖЕҢІМПАЗДАРЫ «ҮЗДІК АУЛА», «ҮЗДІК КӨШЕ», «ҮЗДІК ҮЙ», «ҮЗДІК ТҰРҒЫН ҮЙ АЛАБЫ», «ҮЗДІК АУЛА СЫПЫРУШЫ» ДЕП АТАЛАТЫН 5 НОМИНАЦИЯ БОЙЫНША МАРАПАТТАЛАДЫ, — ДЕДІ Ю.АРЗЫХАНОВ.

Биылғы акцияның жүлде қоры 4,3 миллион теңге. Акция жеңімпаздарын бағалы сыйлықтар күтіп тұр. Азаматтық альянс төрағасы Жұмағали Білісбеков аталған іс-шараға кәсіпкерлерді бизнес әлеуметтік жауапкершілігі аясында атсалысуға шақырып отыр.

–Алғашқы акция басталған жылы жүлде қоры шағын еді. Кейін қала тұрғындарының қызығушылығы артып, акция мегаполиске танымал бола түскен соң жүлде қоры да қомақтала түсті. Бұл Шымкенттің өзіне тән жеке акциясы болғандықтан оны дәстүр ретінде сақтап қалуымыз керек. Сондықтан мен кәсіпкерлерді меценат ретінде аталған іс-шараға қаржылай қолдау білдіруге шақырып отырмын. Бизнестің әлеуметтік жауапкершілігі деген бар. Соны әрбір бизнес өкілі терең сезініп, қаланың тазалығына өзіндік үлесін қосса деген тілегім бар. Өйткені шымкент біздің ортақ үйіміз. Оны таза ұстау әрбіріміз үшін үлкен жауапкершілік жүктейді,- деді Жұмағали Білісбеков.

Айта кету керек, «Таза қала» акциясына биыл тура он жыл толады. 2012 жылы Азаматтық альянстың бастамасымен қолға алынған іс-шара қаланың жыл сайынғы дәстүрлі байқауына айналып үлгерді. Бір ерекшелігі мұндай акция республиканың өзге өңірлерінің ешбірінде жоқ.

«Шымкент келбеті» — Әнуар ЖҰМАШБАЕВ,
Фото: Серік ҚОСАЕВ

Соңғы жаңалықтар

ҰҚСАС ЖАЗБАЛАР