Шымкентте жас мамандарды жұмысқа орналастыру және зейнет демалысына шығатын жұмысшыларға лайықты ізбасар дайындауды мақсат еткен “Ұрпақтар келісімшарты” жобасына қатысып, жұмысқа жолданып жатқандардың дені — жастар. Солардың бірі — Нилюфар Убайдуллаева.
Ол өткен жылы Шымкенттегі Жеңіл өнеркәсіп және сервис колледжін “Тігінші” мамандығы бойынша тәмамдаған. Осы жылдың маусым айының басында ол “Ұрпақтар келісімшарты” жобасына қатысуға өтінім беріп, қалалық халықты жұмыспен қамту орталығына тиісті құжаттарын өткізіп, нәтижесінде жеке кәсіпкер “Қасиет Collection” тігін цехына жолданған. Жас маман аталған өндіріс орнында зейнет жасына жақындаған тігін шебері Гүлчехра Егембердиевамен (суретте) орын ауыстыратын болады.
— Бұл жұмыс іздеп жүрген немесе жұмыссыз жастар үшін зор мүмкіндік деп ойлаймын. Тәжірибе жинақтайсың. Тәжірибелі тәлімгерден істің қыр-сырын үйренесің. Жобамен келгеніме еш өкінбеймін. Өзімді жақсы қырымнан көрсетсем тұрақты жұмысқа тұруға да мүмкіндік мол, — дейді Нилюфар Убайдуллаева.
Биыл Шымкентте “Ұрпақтар келісімшарты” жобасымен 24 адамды жолдау жоспарланған.
Аталған жобаға қатысушының айлық жалақысы — 91890 тг. Мерзімі — 6 ай.
Сонымен қатар Шымкент қалалаық жұмыспен қамту орталығы жастардың тұрақты жұмысқа орналасуына сөйтіп қаламызда жұмыссыздық деңгейінің төмендеуіне бар күш-жігерін салып келеді. Соның бірі жуырда шымкенттің Арбат көшесінде ұйымдастырылған «Мүмкіндіктер мекені» атты жұмыс берушілер жәрмеңікесін атап өтуге болады. Аталған іс-шараға жүзден астам жұмыс берушілер қатысты. «Бұл өте үлкен мүмкіндік. Осы жәрмеңкеге келген әрбір азамат тікелей жұмыс берушімен тілдесуге мүмкіндік алады. Егер түйіндеме жаза алмаса оған көмектесетін мамандар бар. Психологиялық жәрдем де беріледі» деген болатын аталған жәрмеңкені ұйымдастырушылар. Осы орайда мұндай іс-шара қаламызда алдағы уақытта да тұрақты өкізіліп тұрады. Ең бастысы осындай жәрмеңкелер арқылы мегаполисте қаншама екі қолға бір күрек тауып жатыр.
