Қала күні мерекесінде шаһардағы «Жұлдыз» индустриялық аймағында «ORDA NS BUILDING» ЖШС жүзеге асырған шағын және орта бизнеске арналған өнеркәсіп аймағының ашылу рәсімі өтті. Іс-шараға қала әкімі Ғабит Сыздықбеков, бизнес-қоғамдастық және БАҚ өкілдері қатысты.
Жаңа өнеркәсіп аймағы шағын және орта бизнесті қолдау, өндіріс секторын дамыту және заманауи индустриялық инфрақұрылымды қалыптастыру мақсатында құрылған.
Жоба аясында кәсіпкерлерге дайын өндірістік алаңдар ұсынылады. Бұл жаңа кәсіпорындарды іске қосуды жеделдетіп, жұмыс істеп тұрған өндірістердің ауқымын кеңейтуге мүмкіндік береді.
Қала әкімі өндірістік аймақтың жұмысына сәттілік тілеп, әкімдік тарапынан барлық қажетті қолдаулар жасалатынын атап өтті.
Жобаның жалпы инвестициялық құны – 13 млрд теңге. Оның ішінде алғашқы кезеңге 8,3 млрд теңге инвестиция салынған. Жобаны іске асыру үшін «Жұлдыз» индустриялық аймағынан көлемі 9,6 гектар жер телімі бөлінді. Нысанның өндірістік қуаты жалпы аумағы 50 мың шаршы метрге дейін дайын өндірістік ғимараттарды орналастыруға мүмкіндік береді.
Өнеркәсіп аймағының іске қосылуы шағын және орта кәсіпкерлікті қолдауға, жаңа жұмыс орындарын ашуға және қаланың экономикалық әлеуетін нығайтуға серпін береді.
Жаңа өндірістік аймақ кәсіпкерлер үшін барлық қажетті инженерлік-коммуникациялық инфрақұрылыммен қамтамасыз етіліп, өндірісті қысқа мерзімде іске қосуға қолайлы жағдай жасайды.
Мұнда өндіріс орындарын орналастыру арқылы өңдеу өнеркәсібінің үлесін арттыру, жергілікті өнім көлемін көбейту және импортты алмастыратын тауарлар өндірісін дамыту көзделіп отыр. Сонымен қатар, жоба өңірге жаңа инвестициялар тартуға, заманауи технологияларды енгізуге және өндіріс саласында білікті мамандарға деген сұранысты арттыруға ықпал етеді. Өнеркәсіп аймағында жұмыс істейтін кәсіпорындар арасында кооперациялық байланыстарды дамыту да маңызды бағыттардың бірі саналады. Бұл өндірістік шығындарды азайтып, өнімнің бәсекеге қабілеттілігін арттыруға мүмкіндік береді.
