Шымкентте Startup Orda инкубациялық бағдарламасының Demo Day финалдық кезеңі өтіп, үздік стартап жобалар көпшілікке таныстырылды. Үш айға созылған білім беру, тәлімгерлік және өнімді әзірлеу кезеңінен кейін жас кәсіпкерлер өз идеяларын қорғай отырып, инвесторлар мен сарапшылар алдында кәсіби деңгейде жобаларын көрсетті.
Іс-шара барысында Шымкент HUB аймақтық менеджері Құрманғазы Мұратов бағдарламаның өңірдегі маңыздылығына тоқталды. Оның айтуынша, биылғы инкубацияға жалпы 82 жоба тіркеліп, олардың ішінен 20-ға жуық стартап жүйелі түрде жұмыс жүргізіп, финалға жолдама алған. Ол Startup Orda бағдарламасының стартаперлерге өнімді әзірлеу, нарықты зерттеу, бизнес үлгіні қалыптастыру, техникалық және коммерциялық бағыттағы жүйелі қолдау көрсетуге бағытталғанын атап өтті. Сонымен қатар әр стартапқа бекітілген 2 трекердің кәсіби көмегі, тәжірибелік сабақтар мен 3-4 офлайн воркшоптардың жас кәсіпкерлер үшін үлкен тәжірибе болғанын жеткізді. Аймақтық менеджер тәжірибелі мамандардың қатысуы да қатысушыларға зор мүмкіндік бергенін айтып отыр.
Айталық, жұмысын таныстыруға келген Орталық Азия инновациялық университетінің өкілі өз сөзінде Astana Hub ұйымдастырған бұл бағдарламаның жас мамандар мен жас кәсіпқойлар үшін тиімді алаң екенін атап өтті. Оның айтуынша, 2 ай көлемінде өткізілген сабақтар барысында стартап құрылысының негізгі принциптері: нарықты зерттеу, өнімнің қажеттілігін анықтау, мақсатты аудиторияны белгілеу, баға саясатын қалыптастыру және инвестиция тарту жолдары кеңінен түсіндірілген. Бағдарламаға 20-дан аса команда қатысып, студенттерден бастап тәжірибелі мамандарға дейін әртүрлі жастағы қатысушы өз жобаларын дамытуға мүмкіндік алған. Мәселен, оның Smart Walk жобасы ЦСА диагнозы бар балаларға арналған интерактивті электронды ходуноктың қолжетімді әрі тиімді технология боларына сенім мол. Оның айтуынша, Қазақстанда ресми мәлімет бойынша 19 мыңға жуық бала ЦСА-мен ауырады, ал ЦСА елдерінде бұл сан 50 мыңға дейін жетуі мүмкін деген болжам бар.
