Шымкент қаласында ғылымға құштар жасөспірімдер үшін маңызды оқиға өтті. Қонаев мектебінде Шымкент қаласының Әдістемелік орталығы және USTEM Foundation ұйымдастырған Shymkent FIRST Regional 2025 инженерлік чемпионаты жоғары деңгейде өтіп, жас инженерлердің жалынды энергиясы мен тың идеяларына толы күн ретінде есте қалды. Бұл шара қаланың ғана емес, бүкіл өңірдің STEM бағытына қызығушылық танытқан жасөспірімдеріне үлкен серпін берді.
Чемпионат алаңы нағыз технологиялық орталыққа айналды. Мұнда робототехника, инженерлік жобалау, инновациялық модельдер құрастыру, зерттеу жұмыстары және командалық жұмыс сияқты бағыттар қамтылды. Қатысушылар өз жобаларын қорғап, роботтарын сынап, күрделі тапсырмаларды шешу арқылы логикалық ойлау, ғылыми талдау және инженерлік тәсілдерді қолдану қабілеттерін көрсетті. Қазылар алқасы командалардың техникалық сауаттылығын, шығармашылық шешімдерін, идеяның өзектілігін және командалық үйлесімділігін басты назарға алды.
Жарыс барысында оқушылардың технологияға деген құлшынысы айқын сезілді. Әрбір команда өз роботтарын таныстырып қана қоймай, олардың қандай мақсатқа бағытталғанын, қандай техникалық ерекшеліктері барын, қандай мәселелерді шеше алатынын жан-жақты түсіндірді. Осындай білім мен тәжірибені мектеп қабырғасында игеріп жүрген жасөспірімдердің деңгейі қазылар мен көрермендерді таңғалдырды.
Жеңімпаздар және Central Asia FIRST Championship 2025 кезеңіне жолдама алған командалар:
- FLL Discover – Excellent Explainers номинациясы — Yassi командасы — №149 жалпы орта мектеп, Шымкент қаласы
- FLL Explore – Champion’s Award Winner — Auzhan_KTL — Auzhan KTL мектебі
- Champion’s Award Finalist: NomadX80 — №80 IT мектеп-лицейі
- FLL Challenge – Champion’s Award Winner (Keleshek League) — ShymkentTech145 — №145 жалпы орта мектеп
- FLL Challenge – Champion’s Award Winner — WiNIS — Назарбаев Зияткерлік мектебі (Шымкент)
- Champion’s Award Finalist: Форсаж — №75 мектеп-гимназия
Әр номинация бойынша жеңімпаз атанған командалар Central Asia FIRST Championship 2025 кезеңіне жолдама алып, Қазақстанның намысын аймақтық деңгейде қорғауға мүмкіндік алады. Бұл — жас өнертапқыштар үшін үлкен тәжірибе, ал мектептер үшін білім мен инновацияны дамытудағы маңызды қадам.
Чемпионат жасөспірімдердің тек техникалық қабілеттерін ғана емес, олардың өз ойын анық жеткізіп, ғылыми тұжырым жасай алуын, жаңа идеяны іске асыру жолдарын түсіндіруін және командалық үйлесімділігін дамытуға бағытталған. FIRST рухының басты мақсаты да осы — ғылым мен технологияны қоғамға жақындату, жас буынды инженерлік салаға тарту, болашақ мамандарды ерте кезеңнен қолдау.
Қатысушылардың көпшілігі болашақта инженер, бағдарламашы, конструктор немесе ғалым болуды мақсат ететінін жасырмады. Чемпионат олар үшін үлкен шабыт көзіне айналып, жаңа жобаларға жол ашты.
Жас инженерлердің техникалық ойлауы мен шығармашылық қабілеті тоғысқан бұл күн Шымкенттегі STEM қауымдастығының әлеуетін тағы бір мәрте дәлелдеді.
STEM рухы – болашаққа бастар жол!
