2025 жылдың 26–28 қараша күндері Тараз қаласында өткен республикалық “Маралтай оқулары” шығармашылық байқауы жас таланттардың басын қосып, қазақ поэзиясының көркемдік әлемін жаңа қырынан танытқан ерекше мәдени шараға айналды. Биылғы байқауға еліміздің әр өңірінен келген жүздеген талапты жас қатысып, ақын Маралтай Райымбекұлының шығармаларын дәріптеу мен жаңа буын ақындардың өнерін қолдауға бағытталған тартысты сайыс ұйымдастырылды.
Шымкент қаласынан барған қатысушылар да бұл додада жоғары шеберлік танытып, үздіктер қатарынан көрінді. Қалалық білім беру ұйымдарының оқушылары екі номинация бойынша сынға түсіп, қазылар алқасының ықыласына бөленді.
Байқау төмендегі бағыттар бойынша өткізілді:
“Тарпаң мінезді Маралтай” – қатысушылар ақын өлеңдерін жатқа, көркем жеткізу арқылы өз шеберлігін көрсетті;
“Жас ғасыр, жаңа замана” – жас ақындардың тың шығармаларын бағалайтын мүшәйра.
Шымкенттің жас дарындары – республикалық деңгейдегі үздіктер қатарында
№118 “Көкбұлақ” жалпы орта мектебінің оқушысы Дарханбай Қаршыға “Жас ғасыр, жаңа замана” номинациясы бойынша ерекше көзге түсіп, өзінің мазмұны терең, тіл өрнегі келісті шығармасымен жүлделі орынға ие болды. Жас ақын шығармашылығындағы жаңашылдық, ой ұшқырлығы мен поэтикалық дәлдік қазылар тарапынан жоғары бағасын алды. Ол байқау сертификатын және 30 000 теңге көлеміндегі ақшалай сыйлықты иеленді.
Фурқат атындағы №37 жалпы орта мектебінің оқушысы Қуанышқызы Әлия “Тарпаң мінезді Маралтай” номинациясында ақын өлеңдерін жүрекпен сезініп, мәнерлеп оқудағы ерекше шеберлігімен көзге түсті. Сахна мәдениеті, дауыс ырғағы және мәтінді көркем жеткізе білу қабілеті оны жүлдегерлер қатарына шығарды. Әлияға байқау грамотасы мен 30 000 теңге көлеміндегі ақшалай сыйлық табысталды.
Шығармашылыққа қолдау – жас буынның дамуына жол ашады
Ұйымдастырушылардың айтуынша, “Маралтай оқулары” жыл сайын жас дарындардың өзіндік қолтаңбасын қалыптастыруға, қазақ әдебиетіне деген қызығушылығын арттыруға ықпал етіп келеді. Ал Шымкент қаласынан барған қатысушылардың биылғы нәтижесі – өңірдегі шығармашылық ортаның белсенді дамып келе жатқанын көрсетеді.
Қалалық білім басқармасы мен ұстаздар қауымы жас өнерпаздарды шын жүректен құттықтап, олардың алдағы уақытта да республикалық және халықаралық деңгейде биік белестерді бағындыратынына сенім білдірді.
Жас таланттарға жарқын жетістіктер, шабыт пен жаңа жеңістер тілейміз! Шымкент оқушыларының шығармашылық жеңісі – бүкіл қала үшін мақтаныш.
