Шымкент қаласындағы жалпы білім беретін мектептерде педагогтерге арналған жаңа оқу курстары басталды. Бұл бастама Ыбырай Алтынсарин атындағы Ұлттық білім академиясының еліміз бойынша іске асырып отырған бағдарламасының бір бөлігі болып табылады. Оқыту жобасының басты мақсаты — мұғалімдер мен оқушылардың жасанды интеллектіні (ЖИ) жауапкершілікпен, этикалық тұрғыда және қауіпсіз қолдану мәдениетін қалыптастыру.
Білім беру жүйесіне цифрлық технологиялар қарқынды еніп жатқан қазіргі кезеңде жасанды интеллектіні дұрыс пайдалану – маңызды міндеттердің бірі. Шымкент қалалық білім басқармасының мәліметінше, бұл курстарға қаладағы барлық мектептердің педагогтері қатыса алады. Бағдарлама жасанды интеллектінің мүмкіндіктерін тиімді қолданумен қатар, оның шектеулерін де түсіндіруге бағытталған.
Оқыту барысында мұғалімдерге бірнеше негізгі қағидат түсіндіріліп жатыр: баланың игілігіне басымдық беру, академиялық адалдықты сақтау, дербес деректердің қауіпсіздігін қамтамасыз ету, сондай-ақ қолданылатын дереккөздерді нақты белгілеу. Педагогтерге ЖИ құралдарын сабақтың мазмұны мен мақсатына сәйкес таңдау, алынған нәтижелерді сыни тұрғыдан бағалау және технологияны қауіпсіз пайдалану жолдары үйретіледі.
Бағдарламада оқушыларға арналған бағыт та бар. Жас буын өкілдері жасанды интеллектінің табиғатын, оның артықшылықтары мен шектеулерін түсінуге, алынған ақпаратты дұрыс талдап, қажет болған жағдайда түзету енгізуге үйренеді. Сонымен бірге оқушылар академиялық адалдық қағидаларын ұстану және ЖИ негізінде пәнаралық жобалар жасау тәсілдерін меңгереді.
Курс материалдары арнайы дайындалған ресми құжаттарға негізделген. Атап айтқанда, «Орта білім беру жүйесінде жасанды интеллектіні қолданудың этикалық стандарттары» және «Оқу үдерісінде жасанды интеллектіні этикалық қолдану жөніндегі нұсқаулық» атты нұсқаулықтар оқу барысында басты құрал ретінде қолданылады. Бұл құжаттар білім беру жүйесіндегі барлық қатысушылардың — мұғалімдер, оқушылар және ата-аналардың — цифрлық ортада қауіпсіз және саналы әрекет етуіне мүмкіндік береді.
Шымкенттегі мектеп ұстаздары бұл курстың маңыздылығын ерекше атап өтуде. №65 мектептің информатика пәнінің мұғалімі Ләззат Төлеуова былай дейді:
«Қазіргі оқушылардың өмірі цифрлық кеңістікпен тығыз байланысты. Сондықтан ЖИ құралдарын жауапкершілікпен пайдалану мәдениетін қалыптастыру — білім беру жүйесіндегі жаңа кезеңнің талабы. Бұл курс мұғалімдерге ғана емес, оқушыларға да пайдалы болмақ».
Ы. Алтынсарин атындағы Ұлттық білім академиясы еліміздегі педагогтерге тұрақты әдістемелік қолдау көрсетіп келеді. Инновациялық тәсілдерді енгізу арқылы білім сапасын арттыру және болашақ ұрпақты технологиялық сауатты тұлға ретінде тәрбиелеу — академия жұмысының басты бағыты.
Бүгінде Шымкент қаласында 500-ден астам мектеп жұмыс істейді, онда 40 мыңнан астам мұғалім еңбек етеді. Қалалық білім басқармасы жыл соңына дейін барлық мектептерді бұл оқыту бағдарламасымен қамтуды жоспарлап отыр.
