2025–2026 оқу жылы Шымкент қаласының колледждерінде оқитын жастар үшін тың мүмкіндік басталды. Енді студенттердің көбі теорияны тек аудиторияда емес, нақты өндірістік алаңда меңгеретін болады. Дуальды оқыту жүйесі арқылы қаладағы техникалық және кәсіптік білім беру ұйымдарында білім алушылардың саны артып, биылғы көрсеткіш өткен жылмен салыстырғанда 27 мыңға көбеймек. Республика көлемінде дуальды оқумен қамтылған студенттердің жалпы саны 135 мыңға жетсе, оның елеулі бөлігі Шымкент қаласының үлесінде.
Бұл жүйе білім алушыларға уақытын тиімді өткізуге мүмкіндік береді: сабақтың 60 пайызы кәсіпорындарда өтеді. Яғни студент бір мезетте әрі оқиды, әрі болашақ мамандығын практикада игереді. Шымкент – өндіріс, құрылыс және қызмет көрсету секторы қарқынды дамып келе жатқан қала. Сондықтан дуальды жүйенің енгізілуі жергілікті еңбек нарығындағы кадр тапшылығын шешуге үлкен үлес қоспақ. Бүгінде қаладағы 100-ден астам кәсіпорын колледждермен әріптестік орнатып, студенттерге тәлімгерлік қолдау көрсетуде.
Өткен жылы Шымкент колледждерінде дуальды форматта оқыған түлектердің 70 пайыздан астамы оқу бітірген бойда жұмысқа орналасқан. Бұл – жүйенің тиімділігін дәлелдейтін нақты көрсеткіш. Биылдан бастап студенттерге ақылы тағылымдама ұйымдастыру, өндірістік шеберханаларды кеңейту және жұмысқа жолдамалар беру жоспарланған. Әсіресе машина жасау, құрылыс, энергетика, IT және сервис салалары бойынша кадр даярлау басымдыққа ие болып отыр.
«Дуальды оқыту – Шымкенттегі кәсіптік білімнің болашағы. Жастарымыз оқуын тәмамдамай жатып, тәжірибе жинақтап, жұмыс берушімен байланыс орнатады. Бұл – олардың бәсекеге қабілеттілігін арттырады», – дейді қалалық білім басқармасының өкілдері.
Жаңа жүйе еңбек нарығына серпін беріп қана қоймай, әрбір түлектің кәсіби жолын айқындауға ықпал етеді. Шымкентте ашылып жатқан жаңа өндірістік аймақтар мен зауыттар да осы жастарды болашақ кадр ретінде күтіп отыр. Сондықтан дуальды оқытудың кеңеюі мегаполистің әлеуметтік-экономикалық дамуына да тікелей әсер етпек.
