Жаңа оқу жылы қарсаңында Қазақстан бойынша магистратура мен докторантураға қабылдау қорытындылары жарияланды. Бұл үрдіс Шымкент қаласының жастары үшін де ғылым әлеміне қадам басудың тың мүмкіндіктерін айқындады.
Биыл елімізде магистратураға түсу үшін кешенді тестілеуге 51 мыңнан астам өтінім қабылданды. Бұл өткен жылға қарағанда 9,5 мыңға көп. Тестілеуге қатысқан 47 798 үміткердің жартысына жуығы шекті балды еңсеріп, білімге деген ынта-жігерін дәлелдеді. Орташа балдың 72,9-ға жетуі де жастардың дайындық деңгейі мен ғылымға деген қызығушылығы артып келе жатқанын көрсетеді.
Шымкенттегі жоғары оқу орындары да бұл көрсеткішке елеулі үлес қосты. Қаладағы М.Әуезов атындағы ОҚУ, ОҚМПУ және бірқатар техникалық университеттердің түлектері инженерлік, педагогикалық және ақпараттық-коммуникациялық бағыттарға молынан өтініш берді. Биыл магистратураға бөлінген 13 554 мемлекеттік гранттың қомақты бөлігі осы салаларға тиесілі болды.
Докторантураға деген сұраныс та жоғары деңгейде. Ел бойынша сынаққа қатысқан 4 307 адамның 3 146-сы ғылым жолын жалғастыруға мүмкіндік алды. 2025–2026 оқу жылына 2 919 мемлекеттік грант бөлініп, оның ішінде педагогика, инженерлік-техникалық және ақпараттық технология салаларына ерекше басымдық берілді. Бұл бағыттарда шымкенттік жастардың да белсенділігі байқалады.
Айта кетерлігі, бүгінде докторантураға қабылдау толығымен жоғары оқу орындарының құзыретіне берілген. Бұл университеттердің дербестігін арттырып қана қоймай, оқу орындарының ғылыми әлеуетін көтеруге жол ашады. Шымкенттегі ЖОО-лар өздерінің ғылыми орталықтары мен зертханаларын дамытып, аймақтың жас ғалымдарын қолдауды күшейтуде.
Жаңа академиялық маусымда Шымкенттің жүздеген жасы ғылымға қадам басты. Олар – ертеңгі күні елдің ғылыми жаңалығын ашып, аймақтың дамуына үлес қосатын буын. Ғылым жолына түскен әр жас ізденуші – тек жеке жетістікке емес, бүкіл елдің, соның ішінде Шымкенттің интеллектуалды әлеуетін арттыруға үлес қоспақ.
