«Жалпыға бірдей білім беру» қоры аясында ата-аналардың және заңды өкілдердің есепшоттарына мектеп формасын, аяқ киім мен оқу-құралдарын сатып алу үшін шамамен 20 млрд теңге аударылған. Қолдау 430 мыңнан астам баланы қамтыған. Бұл Оқу-ағарту министрлігі хабарлады.
Биыл көмек 500 мыңнан астам балаға көрсетіледі. Оның ішінде – жетім балалар, ата-анасының қамқорлығынсыз қалғандар, аз қамтамасыз етілген және атаулы әлеуметтік көмек алушы отбасылардың балалары, сондай-ақ өмірлік қиын жағдайға тап болған балалар бар.
Бүгінде Астана мен Шымкент қалаларында қаражат толық көлемде аударылған.
«Өңірлер ата-аналардың есепшоттарына қаражатты белсенді аударып жатыр. Көмек алғандар сатып алынған тауарларды растайтын құжаттарды ұсынуы тиіс. Төлемді алу үшін өтініш жазу жеткілікті», деді Оқу-ағарту министрлігі Балалардың құқықтарын қорғау комитетінің төрайымы Насымжан Оспанова.
2025 жылы «Жалпыға бірдей білім беру» қоры бойынша жалпы қаржыландыру көлемі 23,1 млрд теңгені құраған. Төлем мөлшері өңірлік бюджетке сәйкес, мәслихат шешімі негізінде белгіленеді және бір балаға кемінде 46 228 теңгеден төмен болмауы тиіс.
Айта кетейік, 2023 жылдан бері материалдық көмек көлемі 2,5 есеге өсіп, 17 мыңнан 46 мың теңгеге дейін артқан.
Қаражаттың мақсатты жұмсалуын қамтамасыз ету үшін төлемдер қолма-қолсыз тәртіпте жүргізіледі және рұқсат етілген санаттармен (форма, аяқ киім, кеңсе тауарлары) шектеледі. Электронды чектерді eGov немесе өңірлік платформаға жүктеу міндеттелген. Қамтудан тыс қалған отбасылар аудандық білім бөліміне, 111 бірыңғай желісіне не мектеп әкімшілігіне жүгініп, өтінім бере алады. Шалғай ауылдарда серіктес дүкендер мен жылжымалы жәрмеңкелер іске қосылды. Қоғамдық бақылау топтары мен ата-ана комитеттері мониторингке тартылады, нәтижелер ашық дашбордта жарияланып, көмек көлемі инфляцияға қарай кезең-кезеңімен қайта қаралады.
