Әрбір бала – өзінің әлеуметтік, экономикалық немесе географиялық ерекшелігіне қарамастан сапалы білім алуға құқылы. Бұл мәселенің түйінін тарқату ең алдымен қарапайым мектеп жағдайын жақсартудан басталады. Осы бағытта мемлекет қолға алған стратегиялық ұлттық жоба – «Келешек мектептері». Бүгінде оның алғашқы нәтижелері Шымкент қаласында да көрініс беріп отыр.
Шаһарда соңғы жылдары оқушы орнының тапшылығы өткір тұрғаны белгілі. Қалада үш ауысымды мектептер мен тозығы жеткен ғимараттар баршылық. Мұндай жағдайда жаңа форматтағы мектептердің салынуы – өзекті мәселені шешудің басты жолы. Өйткені халықаралық зерттеулер де көрсеткендей, ауылдағы немесе шеткері аймақтағы оқушылардың білім сапасы қаладағы құрдастарынан артта қалып жатады. Осы алшақтықты қысқартуға бағытталған жобаның нәтижесін шымкенттіктер де сезініп келеді.
Жаңа оқу жылы қарсаңында қалада «Келешек мектептері» үлгісінде бірнеше жаңа білім ордасы пайдалануға берілді. Мұнда оқушыларға бір ауысымда оқуға мүмкіндік жасалып, қосымша үйірмелер мен шығармашылық залдарға тікелей өз мектептерінде қатысуға жағдай қарастырылған. Әр кабинет заманауи құрал-жабдықтармен қамтылып, кең әрі жарық сыныптар жасақталған. Ерекше балаларға қолжетімді орта қарастырылып, спорт және шығармашылық бағыттағы үйірмелер кеңейтілді.
Оқу-ағарту министрі Ғани Бейсембаев биылғы Тамыз конференциясында:
«Келешек мектептерінің құрылысы тың өзгерістерге жол ашып, үш ауысымды мектептердің санын азайтуға, апатты жағдайдағы оқу орындарын қысқартуға мүмкіндік берді. Жоба білім беру жүйесінің қарқынды дамуына жаңа серпін беріп отыр», – деп атап өтті.
Ал вице-министр Еділ Оспан бұл бастаманың ауыл мен қала арасындағы теңсіздікті жоюға бағытталғанын жеткізді. Оның айтуынша, жаңа мектептердің жартысына жуығы ауылдық елді мекендерде салынып жатыр. Бұл – 200 мыңнан астам ауыл баласын сапалы әрі заманауи білім орнымен қамтуға мүмкіндік береді.
Шымкент қаласында да дәл осы бағыттағы жұмыстар жүйелі атқарылуда. Қала әкімдігі мен министрлік арасындағы үйлесімді жұмыстың нәтижесінде бірнеше жаңа мектептің құрылысы қарқынды жүріп жатыр. Олар аяқталса, оқушы орнының тапшылығы едәуір қысқарады.
Қысқасы, «Келешек мектептері» – білім саласындағы жаңа парадигма. Бұл жоба әр баланың жан-жақты дамуына тең мүмкіндік беріп, елдің интеллектуалды әлеуетін көтеруге жол ашады. Шымкенттегі жаңа мектептердің келбеті – осы бастаманың нақты жемісі.
