Қазақстанда 13 шілдеде білім беру гранттарын тағайындау конкурсына қатысу үшін өтініш қабылдау науқаны басталды. Бұл науқан 20 шілдеге дейін жалғасады. ҚР Ғылым және жоғары білім министрлігінің мәліметінше, өтініш қабылдаудың алғашқы күнінде-ақ 10 мыңнан астам талапкер грант иегері болуға ниет білдіріп, құжаттарын тапсырған.
Биыл да талапкерлер арасында педагогикалық және инженерлік мамандықтар ерекше сұранысқа ие болып отыр. Атап айтқанда, өтініштердің басым бөлігі «Педагогикалық ғылымдар» мен «Инженерлік, өңдеу және құрылыс салалары» бағыттарына келіп түскен. Бұл елдегі кадр сұранысының құрылымымен тікелей байланысты – білім беру, құрылыс, инфрақұрылым салаларында білікті мамандарға деген қажеттілік артуда.
Грантқа құжат тапсырудың екі жолы қарастырылған: egov.kz порталы арқылы онлайн форматта немесе кез келген жақын орналасқан жоғары оқу орнындағы қабылдау пункттері арқылы офлайн тапсыруға болады.
Конкурсқа қатысу үшін талапкердің жеке куәлігі, ҰБТ сертификаты, 3×4 көлеміндегі фотосуреті, орта білім туралы аттестаты (немесе колледж түлектері үшін дипломы) қажет. Сонымен қатар, жеңілдік беретін санаттар бойынша құжат тапсырғандар арнайы растайтын құжаттарын да қоса өткізеді. Бұл санатқа көпбалалы отбасылардан шыққан талапкерлер, жетім балалар, мүгедектігі бар азаматтар және ауыл квотасы бойынша үміткерлер жатады.
Биылғы грант саны, оқу орындары мен мамандықтар тізімі туралы ақпараттар да ашық форматта ұсынылған. Талапкерлер өздерінің бәсекеге қабілеттілігін бағалау үшін өткен жылдағы конкурс балдарын зерттеп, таңдауларын соған сай жасауда.
Грант иегерлерінің толық тізімі тамыз айының басында жарияланады деп күтілуде.
